Chwyn!

Mae Manon Steffan Ros yn canu ('Pan o'n i'n fach') fod:
"..dant y llew yn chwyn medden nhw, ond welis i'm byd mor dlws".
Gwir y gair. Dim ond planhigyn yn y lle anghywir ydi chwyn wedi'r cwbl, ac mae rhai ohonynt gystal bob tamaid a blodau gardd am edrych yn ddel a denu pryfaid ac adar aballu.



Mi fues i'n crwydro efo'r Fechan rownd y rhandiroedd sy'n segur, a rhyfeddu faint o blanhigion gwyllt sy'n tyfu. Bron yn sicr -o gofio natur corslyd y safle gynt- wedi dod i mewn efo'r topsoil a gafodd y gymdeithas randiroedd am ddim. Ac efallai o'r compost a gafwyd gan y cyngor sir, o'u cynllun compostio gwastraff gardd nhw.




Yn y llun yma mae eithin, melyn yr hwyr, ac aelod o deulu troed yr wydd. Mae degau o blanhigion eraill -sydd ddim i fod yno- hefyd.



Ond y brif broblem ar fy mhlot i ydi glaswellt. Poen tin go iawn. Byswn i angen cadw staff i'w reoli'n iawn!

Miloedd o'r rhain i'w codi...

Mi es i 'nol i'r rhandir ar fy mhen fy hun ddoe (Sadwrn) i chwynnu rhywfaint, gan fod y genod i gyd wedi mynd i Bwllheli am y diwrnod a chael rhyddid i wrando ar albym Dolig Michael Bublé faint fynnon nhw ar y ffordd yn y car! "Dad; ti'n Bah Hymbyg go iawn..."  Wel, dim ond dechrau Tachwedd ydi hi'n de... dwi ddim isio clywed carolau am fis arall diolch yn fawr!

Ta waeth, mi ges i deirawr dda yn yr haul yn chwynnu a chlirio, a rhoi trwch o gompost newydd wrth fonion y marchysgall (globe artichokes), i'w gwarchod rhywfaint rhag amodau'r gaeaf ar y mynydd.
 
Maen nhw wedi magu tyfiant newydd da, ac os gallaf eu meithrin nhw trwy'r hirlwm, dwi'n gobeithio cael cnwd y flwyddyn nesa'.

Erbyn dau o'r gloch, a finna bron a llwgu, a'r rygbi'n galw, daeth cawod drom o law trwy'r haul, ac wrth imi fochel dan y gronglwyd newydd, llwyddais i ddal llun o'r enfys ddwbl yma ar y ffôn: bydd Roger Tap yn tyllu am bot o aur ar ei blot o rwan...

Dyma hi’r gronglwyd, efo’r tanc dŵr, a sylfaen ar gyfer y cwt y soniais amdano o’r blaen.  Dwi’n ofni fod gwaelod y tanc yn rhy isel, ac na fydd modd rhoi jwg o dan y tap... gawn ni weld.

Un joban fach arall yn y glaw, ac adra a fi erbyn canol yr hanner gynta, a Chymru ar y blaen...

Gêm ddifrifol o sâl oedd hi yn y diwedd yn'de; bysa'n waeth imi fod wedi aros allan yn y glaw ddim.