Blogiwr achlysurol iawn fues i'n ddiweddar mae gen i ofn.
Mi farwodd
hard drive ein cyfrifiadur yn ddirybudd, gan fynd a lluniau a dogfennau a dolenni a chyfrineiriau efo fo. Dwi wedi llyncu mul braidd efo pethau digidol wedyn!
Ond dyma fi, efo gliniadur newydd ar fy nglin, yn mwydro eto. Druan ohonoch...
![](https://blogger.googleusercontent.com/img/b/R29vZ2xl/AVvXsEgqcNwg4e7ZOmQedpw6RYSoviRxIe0_uhyphenhyphenee_E7oF-yrVK1i68i4iqR0zEbPan7Diom0Hvr3OicnuFE2pRUnA1tflpBkH5HVscpRo_20vrlwOOiuc925Rb149_MCtGwQ1HUxc24RD-6LqM/s640/cen+map+-Y+Drum+10EBRILL2017pw.jpg) |
Cen map |
Er ein bod wedi cael nifer o ddyddiau braf yn ddiweddar, mae trefn naturiol y ddaear a lwc mul a rhagluniaeth aballu wedi golygu y bu'n rhaid i mi weithio neu deithio neu wneud unrhyw beth ond garddio yn yr haul. Typical! A heddiw, ar y cyntaf o ychydig ddyddiau o wyliau: mae glaw Stiniog wedi dod fel huddug i botas. Eto. Asiffeta bost.
Ond fel'na ma' hi; a fel'na bydd hi hefyd; nes y gwna'i rwbath amdani, 'nde.
![](https://blogger.googleusercontent.com/img/b/R29vZ2xl/AVvXsEjbKvQh1oO3ZSWgLQGM_pCkRGsf5L73rs6_TLWcooS3tfENtXy1FfTIeYexifTiou9w64R1KpCNAv7XIx-TfUGT8mMNiTOoJlQxlzN3B5sQRycFLlBj5rguJiC_enClDtTVS5STgyV_uv8/s640/penabyliaid+Y+Drum+10EBRILL2017pw.jpg) |
Penabyliaid a henna |
Am y tro cynta ers blynyddoedd mi es i ar un o deithiau Cymdeithas Edward Llwyd ddydd Sadwrn (fy nhad a ffrind oedd yn arwain) gan fwynhau sgwrsio'r aelodau a thrydar carlamus hyfryd ehedydd yn yr awyr las. Mi welis i wennoliaid cynta'r flwyddyn hefyd. Er bod arafwch y cerdded yn drysu 'mhen i ar adegau, mi gawson ni daith hyfryd iawn o safle Rhufeinig a Normanaidd Tomen y Mur, heibio Cynfal Fawr, cartref Huw a Morgan Llwyd o Wynedd, i lawr i Warchodfa Natur Genedlaethol Ceunant Cynfal, ac yn ôl heibio Bryn Saeth a Llech Ronw, gan glywed am gysylltiadau niferus yr ardal efo cainc Blodeuwedd yn y Mabinogi.
![](https://blogger.googleusercontent.com/img/b/R29vZ2xl/AVvXsEj6g-FGBJN0LTKGUuRiwfG0Ln6GhZ-OOyPcBCGLLdmY-F8h9Srx3eerjy9v8Pb0thpGWGdDDYDp7c5zDbzjToCPrRiUX2u1aA5dXQfPcfaNlOPJb4Nfo_hvTKnz_0tKV4vDkBqwPYaanCc/s640/canu+titanic.jpg) |
Mi ganith y ddwy yma gân Titanic yn rhywle... Llyn Morwynion, o ben Y Drum |
Mi ges i ddwyawr braf iawn bnawn Llun ar ôl y gwaith hefyd, yn crwydro ardal Beddau Gwyr Ardudwy a Llyn y Drum, efo dwy o'r genod. Dringo'r creigiau a dal penabyliaid, a chael y wefr o wylio ceiliog tinwen yn erlid carlwm rhwng y cerrig uwchben Merddwr Afon Gamallt a Rhyd yr Halen.
Wrth gwrs, roedd y tri ohono' ni'n rhy araf i ystyn am y camera neu'r ffôn i dynnu llun, ond bydd y cof am greaduriaid gwych mewn lleoliad hudolus yn fy nghynnal trwy'r dyddiau glwyb nes byddaf yn gorfod dychwelyd i ngwaith!