![](https://blogger.googleusercontent.com/img/b/R29vZ2xl/AVvXsEgB6cCXscCm_TzxRpG8dboXWwHjwB8InpV1rCZzYHTgcV7Z8cHEI7cSxgeaNs4HlwloND547c7Qb6HVDz_VawxGgArbnsLPaVcAFGx4GB6Z0mWn8Y9zUs8mAV-7VwTjVr8mZGLCCbEY6M8/s1600/pwmpen+Tachwedd+2013.jpg)
Dwi wedi bod yn trio rhoi'r ardd a'r rhandir i'w gw'lau am y gaeaf, heddiw a'r Sul dwytha rhwng cawodydd.
Mae'r ffa olaf wedi eu hel a'u bwyta/rhewi, a dyma'r bwmpen y soniais amdani wsos dwytha. Ddim yn un i'w chadw ar gyfer y sioe sir, ond 'da ni'n edrych ymlaen i'w rhoi hi mewn cyri efo cig oen Cwm Cynfal.
Fel gwelwch o'r llun isod dwi wedi rhoi gorchudd/mulch o ryw fath ar bob un o welyau'r rhandir. Brethyn du gwrth-chwyn ar un o'r gw'lau mawr ac ar y gwely gwsberins; haen o ddeilbridd ar y gwely mafon; a thrwch o hopys ar y ddau arall, ym mlaen y llun.
Dew, mae o'n drewi! A'r gwenyn meirch wrth eu boddau efo fo, hyd'noed yn ail wythnos mis Tachwedd.
![](https://blogger.googleusercontent.com/img/b/R29vZ2xl/AVvXsEjBU69yVeoSjX3ZMpexftWDae_1gctNDFdoEAJHsU7WNRuH12fKDodzgHgLzOEh89MK2RTmKdqNAiRV6AJqJl_aVvXiu8ZfJ62JWu5Jz4IEUAI7g61_7L4MTHP5hXScshPCTNzscb5VsLs/s320/rhandir+3ydd+TACH+2013+(1).jpg)
Bydd y brethyn chwyn 'ma rywfaint o help dros y gaeaf gobeithio.
Son am lwybrau, dyma sut maen nhw'n edrych ar hyn o bryd. Dwi wedi bod rhwng dau feddwl i dorri 'nghalon yn y bali lle.....
![](https://blogger.googleusercontent.com/img/b/R29vZ2xl/AVvXsEismPY2gCHxQZUn-aftkRZ1iWyWWeKZhUlHakbYwWvie7wN9CfuvsDyQtFRt2S3v-fz0iJFwZlqz4Ko8WMNsywOt3z_o0vY3EMdUym4yUFS9nAEeSCV1tF-R32W0RMortv5jVS6uCHi-PU/s640/IMG-20131105-00142.jpg)
Mae'r gymdeithas randiroedd wedi cynnal dau ddiwrnod gwaith yno'n ddiweddar mewn ymgais i wella'r draeniad efo ffosydd a phibelli. Mi es i i'r cynta', ond methais fynd i'r ail.
![](https://blogger.googleusercontent.com/img/b/R29vZ2xl/AVvXsEj_o2saVETDsdqtIBfbbNlvhLRjp3VaOOujM6XYY2LpM9E8PN1bS2J95udsw_qCJSMaLqhi7RsslSU6yFcgxRyKLuaw8u7ojU255oLhwcF1SQeUR11CVF3r87YAlYxO4FU3Rshf1lT-hX4/s320/rhandir+5ed+HYDREF+2013+(5).jpg)
Pwy ddiawl feddyliodd roi rhandiroedd ar gors?!
![](https://blogger.googleusercontent.com/img/b/R29vZ2xl/AVvXsEhoKuvtpk9qDcEzUM7P-EX8KTXWARwaukipd0JEvgpIkwybO2OuuZm4ntsvfoGgxijOaI97_YOBQHEGluDbwJGxs7Okca3T1Nqo_eRwAZZiwD6czX4NM4JVjHNqVjKsDwFUpeeZWBCmcXI/s320/rhandir+5ed+HYDREF+2013+(1).jpg)
Wedi deud hynna'i gyd, pan mae rhywun yn cael teirawr yn yr haul, efo robin goch a llwyd y gwrych yn gwmni, mae'n anodd cwyno tydi!
Tafod yr ych -borage- a Charreg Flaenllym dan awyr las.
No comments:
Post a Comment
Diolch am eich sylwadau